Aubameyang – Barcelona, ky është vendimi i Arsenalit

Futboll 28 Janar 2020 14:02

Arsenali është në pritje të një oferte zyrtare nga Barcelona për sulmuesin Pierre-Emerick Aubameyang.

Ky është informacioni i fundit që jep gazeta britanike Telegraph. “Topçinjtë” e Londrës do të presin deri në fund të javës, kur mbyllet edhe merkatoja e dimrit, për lëvizjen konkrete të klubit katalan, që është në kërkim të një qendërsulmuesi për shkak të dëmtimit të rëndë të Luis Suarezit.

Telegraph siguron që Aubameyang është shndërruar në objektiv kryesor të Barçës për të përforcuar sulmin, ndërsa alternativë tjetër është Rodrigo Moreno i Valelencias, për të cilin drejtuesit “blaugrana” kanë përparuar në bisedime.

Në këto ditë të nxehta të merkatos, ka patur raportime se Pierre-Emerick Aubameyang shihet gjithashtu si pasuesi i mundshëm i Edinson Cavanit te PSG, sigurisht nëse transferimi i uruguajanit tek Atlético e Madridit mbyllet përfundimisht.

Barça ka frikë se Arsenali do të kërkojë më shumë se 50 milionë funte për Aubameyangun, edhe pse ai tashmë është 30 vjeç dhe ka kontratë me londinezët jo më larg se 30 qershori i vitit 2021. Për të njëjtat shifra diskutohet edhe blerja e mundshme e Rodrigo Morenos nga Valencia.

Nga Anglia e mohojnë që Aubameyang dhe Barça kanë mbyllur një marrëveshje paraprake, por ata pranojnë se sulmuesi nga Gabonit, si shumica e futbollistëve, do t’i përgjigjej pozitivisht një thirrjeje për të lënë “Emirates” për “Camp Nou”.

-->