Çfarë po ndodh me Schumacherin? Transportohet në këtë spital për kurim ‘top sekret’

Motosport 09 Shtator 2019 21:40

Pas një kohe heshtje dhe pas triumfit të Leclerc të Ferrarit në Monza, vijnë edhe lajmet për shëndetin e Michael Schumacherit.

Ish-shoferi gjerman arriti sot në Paris, ku u transportua në spitalin Evropian “Georges Pompidou” për një trajtim mjekësor për momentin “top sekret”, siç raportojnë mediat franceze.

Sipas “Le Parisien”, ish-kampioni i Formula 1, i cili u lëndua rëndë në 2013 për shkak të një aksidenti me ski, duhet t’i nënshtrohej transfuzionit të qelizave staminale në trup, në mënyrë që të ketë një reagim “sistematik anti-inflamator”.

Trajtimi duhet t’i bëhet nga profesori Philippe Menasché, kirurg i famshëm kardiak, pionier i terapisë qelizore në trajtimin e insuficiencës kardiake. Menasché është gjithashtu në Këshillin Administrativ të Institutit të Trurit dhe palcës kurrizore.

Në spitalin ku është shtruar, Schumacher është vizituar sot edhe nga kirurgu ortopedik i famshëm Gerard Saillant. Menasché dhe drejtuesit e spitalit “Pompidou”, të kontaktuar nga media franceze, nuk konfirmuan ose mohuan llojin e trajtimit të cilit do t’i nënshtrohet Schumacher, duke u fshehur pas sekretit mjekësor.

Burime për mediat franceze sigurojnë se Schumacher është sjellë të paktën edhe dy herë të tjera kohët e fundit në Paris, e fundit në pranverë. Në qëndrimin e tij të parë, ish-shoferi u shtrua në Pitié-Salpetriere.

Sipas raportimeve, Schumacher ishte menduar të kthehej në Paris për analiza në korrik por ky udhëtim u shty për shkak të një problemi të papritur shëndetësor dhe data u zhvendos në fillim të shtatorit, pas kthimit nga pushimet të profesorit Menasché.