Cristiano Ronaldo shpëton Juventusin, përmbys rezultatin brenda gjashtë minutave

Futboll 02 Maj 2021 20:10

Cristiano Ronaldo shpëtimtari i Juventusit. Portugezi shënoi dy gola si mysafir kundër Udineses, duke zhvlerësuar golin e shënuar nga Molina që në minutën e 10-të.

36 vjeçari realizoi dy herë brenda 6 minutave lojë në fundin e sfidës, duke u dhënë tri pikë me shumë vlerë bardhezinjve, që duhet të jenë shumë të kujdesshëm në katër sfidat e fundit për të mos përfunduar jashtë top katërshes.

Juventusi zhvilloi një pjesë të parë relativisht të dobët, pa mundur të reagonte si duhet pas golit të Molinës. Gjithsesi, atëherë kur sfida po i drejtohej fundit, në momentin e ekzekutimit të një goditjeje të lirë nga Ronaldo, topi përfundoi në dorën e një futbollisti që formonte murin. Nga pika e bardhë nuk gaboi CR7, që realizoi edhe golin e përmbysjes një minutë para fundit të kohës së rregullt. Juventusi renditet në vendin tretë, me 69 pikë, sa Atalanta dhe Milani. /Insporti.com/

-->