Dështon tentimi skandaloz i Agim Ademit për “frikësimin” e kundërshtarëve, reagon Beki i ‘89-it
Ka rezultuar i pasuksshëm tentimi i Federatës së Futbollit të Kosovës për heshtjen e kundërshtarëve te kryetarit Agim Ademi, pas dënimit një vjeçar të shqiptuar të mërkurën kundër presidentit të KF Prishtinës, Remzi Ejupit.
Një ditë pas dënimit të Ejupit nga Komisioni Disiplinor i FFK-së, një goditje tjetër Agim Ademit i ka dhënë edhe Abedin Zeka, një nga presidentët më të “moçëm” në futbollin e Kosovës.
Kreu i Trepçës ‘89 e ka cilësuar të ulët tentimin e FFK-së për heshtjen e kritikëve përmes mekanizmave të federatës.
“Kjo është me shti frikë, mos me fol të tjerët”, ka deklaruar “Beki” në një bisedë me Insportin të enjten. “Çka nëse na dënojnë edhe neve (presidentët e klubeve të tjera), kujt do t’i mbesin, ai kryetari, sekretari, komiteti Ekzekutiv, për kë do të ekzistojnë”.
“Beki”, tutje ka deklaruar se FFK-së nuk po i konvenon qëndrimi i mëtejshëm i donatorëve të vjetër në futbollin e Kosovës.
““Po, Federatës nuk i konvenon ata donatorët e vjetër (Remzi Ejupi) me i eliminu, mos me pas donator të vjetër. Është shumë e pa kuptim federata me dënu një Remzi Ejupi i cili është për mbi 15 vite në futbollin e Kosovës, një ndër kontribuuesit më të mëdhenj edhe nëse Remziu e ka dhanë një deklaratë, nuk e di çfarë, nuk jam për atë unë, unë nuk e di si e kanë marrë këta federatën, e rrugës ka qenë që kryetari, sekretari, i ashtuquajturi Komiteti Ekzekutiv i bërë nga regjionet”.
Numri një i “Minatorëve” në fund të bisedës me Insportin deklaroi se nëse dënohen presidentët për mendimet e lira të tyre, kujt do t’i japin përgjegjësi pasi FFK i ka humbur 15 milionë euro me dështimin për t’u kualifikuar në Kampionatin Evropian që do të zhvillohet këtë vit.
“Kujt i kanë jep përgjegjësi që na i kanë hup 15 milionë euro, që nuk kanë mundur t’i inkasojnë për shkak të mos kualifikimit të Kosovës. Është e drejtë e gjithkujt me dhanë mendimin e vet, nëse ka ndonjë dyshim për diçka. Edhe unë, Remziu e çdo kush ka të drejtë me dhanë një mendim, nuk e di deklaratën e Remziut, nashta ka qenë pak e ngutshme, nashta, por këta me u qu edhe me dënu Remziu”.
Remzi Ejupi ditë më parë në një intervistë me Insportin ka kritikuar punën 20 vjeçarë të krerëve të Federatës së Futbollit të Kosovës. Sipas Ejupit, një grup i caktuar ka uzupuar dhe ngufatur punën e FFK-së për interesa personale.
Pas intervistës, Komisioni Disiplinor kishte dalë në zyre edhe pse ishin në pushim zyrtarisht, me qëllimin e vetëm që ta fusin në procedurë disiplinore presidentin e Prishtinës.
Ndërsa, të mërkurën FFK publikoi edhe vendimin e Komisionit Disiplinor, i cili ka vendosur që ta dënojë Remzi Ejupin me ndalesë në kryerjen e të gjitha funksioneve zyrtare në klub në raport me Federatën e Futbollit të Kosovës në kohëzgjatje për një vit.
Në lidhje me dënimin e Ejupit, klubi i Prishtinës nuk kanë reaguar duke zgjedhur heshtjen. /Insporti.com/
