Haskuka demanton FFK-në: Nuk kam pranuar letër, nuk po e politizoj Lirinë
Kryetari i Komunës së Prizrenit, Mytaher Haskuka ka reguar ndaj letrës së Federatës së Futbollit të Kosovës rreth klubit të Lirisë.
Ditë më parë KF Liria kishte publikuar letrën që kishte pranuar nga FFK-ja se nuk duhet të politizohet klubi dhe se janë duke e monitoruar situatën.
Megjithatë, kryetari Haskuka ka reaguar duke thënë se nuk synon të ndërhyjë politikisht te Liria, por me qenë se Komuna e Prizrenit e financon klubin atëherë ky institucion kërkon llogari për paranë publike.
Insporti ka raportuar gjatë muajit se një investitor gjerman, Francz Gerber ka bërë një ofertë për të marrë në menaxhim klubin e Lirisë, por deri më tani ende nuk është vendosur.
Më 16 qershor të muajit të kaluar asambleja e Prizrenit kishte mbajtur një senacë të jashtëzakonshme të inciuar nga shefi i grupit parlamentar të AAK-së, Ilir Baldedaj. Në atë seancë ishte diskutuar për gjendjen e Lirisë dhe si të dilet nga ajo gjendje.
Për Insportin Baldedaj ka konfirmuar se nesër do të mbahet një seancë ku pikë e rendit do të jetë klubi i Lirisë.
“Nesër do të mbahet një seancë dhe në këtë seancë do të formohet një komision i cili më pas do të vendos për privatizimin e klubit, në rast se vendoset ashtu atëhere ne do të presim gjithë investitorët të bëjnë oferta. Të gjitha partitë politike jemi njëzëri rreth klubit të Lirisë”, ka thënë Baldedaj.
Kujtojmë që komuna e Prizrenit ka financiuar gjatë tërë vitit klubin si dhe e ka ndihmuar të paguajë një pjesë të borxhit.
Ndërkohë, gjermani Gerber është në pritje të një përgjigje nga komuna e Prizrenit. Gerber ka prezantuar një plan projekt prej tre milionë euro.
Liria nga sezoni i ardhshëm do të bëj gara në Ligën e Parë.
Në reagimin nga Mytaher Haskuka në “Facebook” thuhet:
Lidhur me letrën e FFK-së për Lirinë…
Këto ditë nëpërmjet mediave u publikua një lajm me titull: “FFK-ja i çon letër kryetarit të Prizrenit”. Lajmi kishte të bëjë me një letër nga ana e Federatës së Futbollit të Kosovës drejtuar tek unë, në lidhje me klubin e futbollit Liria, me pretekst kinse të politizimit të klubit.
Sa për ta sqaruar opinionin publik, sot e kësaj dite një letër të tillë unë nuk e kam pranuar as nëpërmjet postës, e as nëpërmjet e-mailit zyrtar.
Zakonisht kur kemi lajme të mira në Prizren, interesimi i disa mediave qendrore është i mangët, por këto media nuk ngurojnë të plasojnë tituj tendenciozë që nuk e tregojnë të vërtetën dhe që janë të paverifikuara nga ana e Komunës.
Që nga dita e parë e marrjes së pushtetit, kemi pasur takime me kërkesë nga drejtuesit e klubit, qoftë ata nga kryesia e vjetër apo kryesia aktuale. Këto takime kanë qenë me qëllim të mbështetjes së klubit në aspektin financiar dhe kërkimit të llogaridhënies për paranë publike, ndërsa asnjëherë nuk kemi pasur ndonjë diskutim rreth organizimit të brendshëm në klub.
Liria dihet që shumicën e buxhetit e ka të siguruar nga ana e Komunës dhe ne si Komunë e kemi për obligim që të kërkojmë llogari për paranë publike.
Federata e Futbollit mund të jetë e keqinformuar pasi është bazuar në shkrimet në media dhe nuk ka pasur komunikim të drejtpërdrejtë me Komunën. Pretendimi i Federatës, kinse jemi duke bërë ndërhyrje të dhunshme në klub as që mund të konsiderohet.
Deri më tani është nisur vetëm një iniciativë nga anëtarët e Kuvendit Komunal, për formim të komisionit për monitorim dhe mbikëqyrje jo vetëm të klubit të Lirisë, por të të gjitha subjekteve përfituese nga kodi buxhetor “Politikat zhvillimore të kulturës, rinisë dhe sportit”. Dhe për formim të këtij komisioni do të vendoset nesër nga anëtarët e Kuvendit në mbledhjen e Kuvendit Komunal.
Pra, formimi i këtij komisioni nuk do të ketë për qëllim ndërhyrjen në klub në aspektin organizativ, por do të bëjë vetëm monitorimin e punës së subjekteve përfituese, me theks të veçantë menaxhimin financiar të tyre, dhe do t’i jep rekomandime Kuvendit se si duhet të veprohet tutje me këta përfitues në aspekt të mbështetjes.
Ne jemi të obliguar të kërkojmë llogari për paranë publike, prandaj edhe formimi i komisionit ka po këtë qëllim.
