Juniorët e Kosovës të gatshëm për kampionatin botëror që zhvillohet në Spanjë

Kombëtarja 14 Korrik 2019 09:49

Juniorët e Kosovës të shtunën mbrëma zhvilluan stëvitjen e fundit para nisjes për në Spanjë, shkruan Insporti.com.

Përfaqësuesja e Kosovës U21 në hendboll do jetë pjesë e kampionatin botëror që prej të martës zhvillohet në Spanjë.

Te përfaqësuesja U21 e Kosovës është atmosferë shumë e mirë, ndërsa djemtë po ofrojnë maksimumin në stërvitje dhe janë të uritur për sukses para udhëtimit për në Spanjë.

Përfaqësuesja U21 të hënën në mëngjes niset për në Spanjë, kurse menjëherë të martën e luan ndeshjen e parë.

Është kjo gjenerata që ka shkruar histori, që ka bërë të mundur që për herë të parë Kosova të luajë në një kampionat botëror në sportet ekipore.

Trajneri Fatmir Muhaxheri dhe ndihmësi i tij, Benon Brahushi janë të kënaqur me angazhimin e djemve, ndërsa edhe lojtarët janë të gatshëm për botëror.

“Jemi duke punuar gati një muaj, kemi përfunduar me sukses fazën e parë e tani jemi në përfundim edhe të fazës së dytë. Besoj që jemi mjaft të përgatitur, kemi punuar intenzivisht. Jemi shumë në formë, besoj se do të korrim suksese në Spanjë. Jemi shumë optimist për rezultate të mira”, ka deklaruar Drenit Tahirukaj.

“ Përgatitjet po shkojnë shumë mirë, kurse tashmë jemi ekip shumë më i komponuar. E njohim më mirë lojën e njëri-tjetrit. Kemi pasur më shumë kohë për përgatitje, për të luajtur së bashku. Për këtë mendoj se mund të arrijmë diçka në botëror”, është deklarata e Adrian Halilit.

-->