Këto janë votat më interesante për ‘Topin e Artë’ – Messi as në top 5-she

Për shumëkë ai është futbollisti më i mirë në botë.

Në gala ceremoninë e mbajtur në Paris mbrëmë, Leo Messi u kurorëzua me Topin e Artë për herë të gjashtë në karrierë, transmeton Insporti

Ylli argjentinas kësisoj e la pas rivalin e madh të tij, Cristiano Ronaldon, që tashmë ka mbetur me pesë.

Pas tyre, me nga tre Topa të Artë renditen tri legjendat e futbollit: Michel Platini, Marco Van Basten e Johan Cruyff.

Por, përkundër se Messi mbrëmë e mori shumicën e votave për ta fituar këtë çmim prestigjoz, atë nuk e votuan të gjithë gazetarët sportivë. Madje, kishte shumë të tillë që nuk e kishin futur as në listën e top 5 lojtarëve.

The #BallonDor2019 voting records. Here’s what really matters guys. Have fun. pic.twitter.com/r8d5U7nXYn

— Sport Witness (@Sport_Witness) December 3, 2019

Në listën e top 5 më të mirëve, Leo Messi ishte i pari në listën e gazetarit nga Kosova.

Ndërkaq, gazetari nga Shqipëria e renditi atë në pozitën e tretë, prapa Cristiano Ronaldos dhe Virgil Van Dijkut.

Revista franceze “France Football” ka publikuar edhe votat e të gjithë gazetarëve ku kanë votuar, ku vërehen disa votime më interesante.

Insporti ua sjell disa prej tyre më poshtë:

Gazetari nga Guatemala, Francisco Aguilar Chang, nuk e futi fare në top 5-she Messin. Ai madje duket se është fans i Liverpoolit, pasi ka votuar katër yje të ‘Reds’ në listën e tij.

Interesante ishin edhe votat nga Shri Lanka, të gazetarit Hafiz Marikar.

Ai çuditërisht në pozitën e parë e ka vendosur mbrojtësin e djathtë të Liverpoolit, Trent Alexander-Arnold.

Çudi edhe më e madhe është se Pierre-Emerick Aubameyangu është në pozitën e dytë.

Gazetari i famshëm anglez, Henry Winter i dha pikët maksimale Van Dijkut.

Ai në top 5-she kishte edhe Messin, Ronaldon, Alissonin dhe Sterlingun.

Ndërkaq, dy votimet më interesante janë nga Butani dhe Kameruni.

Dy gazetarët, Gustave Samnick e Passang Norbu, kanë top 5-she krejtësisht të Liverpoolit.

Ndërkaq, gazetari Dafrallah Mouadhen i Emirateve të Bashkuara Arabe, nuk pati as Messin e as Van Dijkun – që përfunduan në dy pozitat e para – në top 5-shen e tij. /Insporti.com/