Kombëtarja në basketboll nuk lejohet të stërvitet – Kjo është arsyeja

Basketboll 09 Gusht 2019 14:07

Përfaqësuesja shqiptare e basketbollit për meshkuj nuk e ka mbyllur si duhet fazën përgatitore për ndeshjen ndaj Danimarkës që do të luhet më 10 gusht në Kopenhagen.

Kuqezinjtë nuk janë lejuar që të zhvillojnë stërvitjen e fundit para takimit ndaj Danezëve.

“Pa fol me shefin nuk e hapim dot sallën, tha. I thashë edhe njëherë atij, jemi ekip kombëtar nuk jemi as ekipi i Tiranës, as ekipi i Selitës, përfaqësojmë Shqipërinë në fund të ditës. E kjo sallë nuk është në shërbim të askujt tjetër përveçse sportit”, u shpreh Afrim Bilali, trajner i kombëtares Shqiptare të Basketbollit.

Marrëveshja e munguar mes Agjencisë së Parqeve dhe Rekreaconit dhe Federatës Shqiptare të Basketbollit, ka lënë kuqezinjtë pa stërvitje në ditën e fundit, duke prishur jo vetëm programin por edhe atmosferën në ekip.

Sa i përket aspektit sportiv, sipas trajnerit Bilali, kombëtarja është në një moment tranzicioni ku po përpiqen të integrohen lojtarë të rinj dhe këto paraeliminatore të Euro 2021 shërbejnë më tepër për përfitim eksperience duke lënë mënjanë trysninë e rezultatit.

“70% e lojtarëve janë nga grupmoshat që vijnë nga zinxhiret e ekipeve kombëtare. 6 lojtarë janë nën moshën 21 vjeç. Shpresoj se këto 2-3 vjet ekipi do të furnizohet me brez të ri. E nëse ky brez, vetë si lojtarë, do të inestohen në përmirësimin e tyre teknik, besoj se kombëtarja shqiptare e basketbollit do të ketë një ekip të mirë”, e mbylli Bilali.