Kosova humbi betejën e parë, por jo edhe luftën: Mundësia e kualifikimit përmes Ligës së Kombeve

Kombëtarja 14 Nëntor 2019 23:56

Kosova i ka humbur gjasat edhe matematikisht për t’u kualifikuar në Kampionatin Evropian, ‘Euro 2020’, përmes fazës kualifikuese grupore, pas humbjes nga Republika Çeke (2-1) në ndeshjen e zhvilluar në Plzen.

Përfaqësuesja jonë e ka edhe një takim të fundit në “Fadil Vokrri”, atë ndaj Anglisë, mirëpo do të zhvillohet vetëm për prestigj, duke qenë se Tre Luanët dhe çekët tashmë janë kualifikuar nga Grupi A për në fazat finale të turneut të madh evropian.

Megjithatë, Kosova nuk i ka humbur të gjitha gjasat për të qenë pjesëmarrëse në ‘Euro 2020’, kjo për faktin se është fituese e Grupit 3 në Ligën D.

Në Kampionatin e ardhshëm Evropian do të marrin pjesë 24 përfaqësuese, 20 prej tyre kualifikohen drejtpërdrejtë nga faza kualifikuese duke zënë dy vendet e para në dhjetë grupet kualifikuese. Kosova nuk është kualifikuar në këtë mënyrë, pasi që Anglia dhe Republika Çeke i kanë zënë dy vendet e para në grupin e saj.

Pra, mundësia e Kosovës është që të kualifikohet përmes barazhit në kuadër të Ligës së Kombeve. Ndeshjet e barazhit do të zhvillohet në mars të vitit 2020 për t’i plotësuar katër vendet e mbetura. Për dallim nga edicionet e mëparshme, ‘play-offet’ nuk do të vendosen në bazë të rezultateve në fazën grupore, por në bazë të performancës së tyre në edicionin 2018/2019 në Ligën e Kombeve.

Fituesit e grupeve në Ligën e Kombeve që nuk janë kualifikuar (në këtë rast Kosova si fituese e Grupi 3 në Ligën D) do t’i zhvillojnë dy ndeshje gjysmëfinale dhe një ndeshje finale me fituesit e grupeve tjera në të njëjtën ligë. Nikoqiri i finales do të vendoset në bazë të shortit.

Pra, Kosova duhet të dalë me rezultat më të mirë ndaj Maqedonisë së Veriut në dy ndeshje gjysmëfinale (si vendas dhe si mysafir) dhe më pas të triumfojë në finale ndaj fituesit të sfidës ndërmjet Gjeorgjisë dhe Bjellorusisë /telegrafi/

-->