Londra e Veriut është e kuqe, Arsenali fiton derbin me Tottenham

Futboll 14 Mars 2021 19:31

Arsenali ka fituar derbin e Londrës së Veriut kundër Tottenham me rezultat 2:1, në ndeshjen që u zhvillua në kuadër të Premier Ligës Angleze, raporton Insporti.com.

Skuadra vendëse e nisi ndeshjen me presion të lartë duke krijuar raste por ishin mysafirët që shënuan të parët.

Lamela e kaloi në epërsi Tottenhamin në minutën e 33-të me një gol të jashtëzakonshëm, pas asistimit nga Lucas.

“Topçinjtë” gjetën motivin dhe barazuan rezultatin në minutën e fundit të kohës së rregullt të pjesës së parë me talentin norvegjez, Martin Odegaard.

Goli i fitores për “Gunners” u realizua pas më shumë se një ore lojë, saktësisht në të 64-tën me autor francezin, Alexandre Lacazette që nuk e pati të vështirë ta dërgonte topin në rrjetë nga pika e bardhë e penalltisë.

Mesfushori shqiptar, Granit Xhaka luajti tërë ndeshjen në “Emirates”, teksa u ndëshkua me karton të verdhë në minutën e 82-të.

Arsenali me këtë fitore ndodhet në vendin e dhjetë me 41 pikë, kurse “Spurs” janë në pozitën e shtatë me 45 pikë. /Insporti.com/

-->