Lushtaku konfirmon transferimin e Harmon te Feronikeli

Futboll 01 Shkurt 2020 13:45

Van Dave Harmon është bërë me skuadër të re në ditën e fundit të afatit kalimtar të janarit.

Sulmuesi nga Liberia shkëlqeu me Drenicën me golat e tij dhe ishte e natyrshme që ofertat në drejtim të tij nuk munguan.

Në ditën e fundit të afatit kalimtar të janarit, Harmon ka nënshkruar me kampionin në fuqi të Kosovës, Feronikelin.

“Mund të konfirmoj që Van Dave Harmon është lojtari më i ri i Feronikelit”.

“Kontrata e lojtarit me Drenicën është zgjidhur me marrëveshje dhe në fund ai ka nënshkruar për Feronikelin”, ka thënë Lushtaku për Telegrafin.

24-vjeçari shënoi gjashtë gola për Drenicën në 12 takime të zhvilluara, duke qenë njëri nga sulmuesit më të mirë në kampionat.

Për të kishte oferta edhe nga kampionati shqiptar, por edhe nga skuadra tjera të Superligës së Kosovës.

“Ka pasur shumë oferta për lojtarin nga Teuta, Laçi, Prishtina e Gjilani, por në fund oferta e Niklit ishte më e mira për lojtarin dhe vendosëm të nënshkruajmë aty”, përfundoi Lushtaku.

-->