Mezani nuk “përmbahet”: Kjo duhet të ishte renditja e vërtetë

Gjilani ka arritur ta sigurojë Ligën e Evropës pas fitores ndaj Flamurtarit. Me fitoren minimale 0:1, klubi i Gjilanit për herë të parë në histori të klubit do të paraqitet në garat evropiane, shkruan Insporti.com.

Megjithatë, përkundër këtij suksesi të arritur duket se në taborrin e Gjilanit ende nuk është shëruar plaga “titull”. Sipas tyre, kampion real është Gjilani dhe jo Drita dhe se janë skuadra e vetme që kanë luajtur vetëm në fushë, e jo me matematika të bërë në zyre të ndryshme.

Trajneri i “Skifterave”, Gentian Mezani pas përfundimit të ndeshjes ka publikuar një fotografi në rrjetin social, në të cilen duket tabela e Superligës.

Fotografia që Mezani ka publikuar është tabela e Superligës në të cilën Gjilani renditet në pozitën e parë me pikë të barabarta, 68 pikë, me Dritën.

Kjo renditje tabelare e gabuar u publikua në faqen e njohur tw rezultateve “Flashscore”.

Megjithatë, sistemi i garave ia mundësoi titullin rivalit të përbetuar Dritës për shkak të përballjeve direkte.

Ndryshe, Mezani për Supersport Kosova, ka deklaruar se e kanë merituar titullin por ishin disa rrethana që ndikuan.

“Ishte një ndeshje e vështirë. Kemi luftuar shumë për këtë fitore dhe ja arritëm. Jemi me pikë të barabarta me kampionin dhe them se dihet kush është fituesi i vërtetë. Unë do të kemi një takim me presidentin dhe pastaj do të them çfarë do të ndodhë”.

Mezani po ashtu deklaroi se edhe më tutje do të mbetet trajner i skuadrës, por ditëve në vijim më shumë për situatën e Gjlanit do të mësojmë nga presidenti i klubit, Florim Zuka. /Insporti.com/