Presidenti i Vushtrrisë: Ndihemi të rrezikuar, futbollistët po respektojnë udhëzimet

Futboll 08 Qershor 2020 13:10

Superliga e Kosovës fundjavën që shkoi rifilloi pas një pauze të gjatë për shkak të pandemisë “Covid19”. Gjatë pauzës ishte diskutuar mjaft shumë për fatin e kampionatit por me përmirësimin e situatës në vend, Federata e Futbollit e Kosovës së bashku me Ministrinë e Shëndetësisë vendosën që kampionati të vazhdojë. Vendimi ishte marrë që futbolli të rikthehej por pa i testuar futbollistët dhe testimi të bëhej në një fazë të më vonshme.

Qyteti që është shndërruar në vatrën e koronavirusit është Vushtrria, qytet që ka një klub në elitën e futbollit tonë. Kjo situatë ka shqetësuar shumë klube të Superligës, pasi rreziku potencial për t’u infektuar ekziston.

Insportin ka kontaktuar me presidentin e KF Vushtrrisë, Bajrush Kajtazin, i cili ka deklaruar se ndihen të rrezikuar edhe pse klubi i tij është duke i respektuar të gjitha udhëzimet nga FFK. “Ne si klub jemi duke i respektuar të gjitha udhëzimet e marra nga FFK, por jemi tejet të shqetësuar pasi ndihemi të rrezikuar. Unë jam shumë i rezervuar, kemi një dozë të madhe të pa sigurisë. Futbollistët dhe stafi munden t’i respektojnë masat, por nuk mund të garantojmë për rrethin e tyre familjar apo shoqëror. Jemi në kontakt të vazhdueshëm me futbollistët por po shpresojmë të mos kemi ndonjë rast në klubin tonë”.

-->