Shqiptari që do të hyjë në histori

Futboll 15 Janar 2020 08:22

Marash Kumbulla me sa duket do të jetë një emër i cili do të hyjë në histori për futbollin shqiptar. Mbrojtësi i talentuar 19-vjeçar është kthyer në një nga emrat më të lakuar të afatit kalimtar në Serie A dhe klubet janë të gatshëm të bëjnë çmenduri për të, edhe pse vetëm adoleshent.

Gjithçka konfirmohet nga takimi më i fundit që ka zhvilluar menaxheri i tij, Gianni Vitali, me drejtues të Interit ku ka diskutuar me zikaltërit mundësinë e transferimit në Milano.

Verona ka vendosur si kusht të vetëm qëndrimin e Kumbullës deri në mbyllje të këtij sezoni por ka lënë menaxherin të lirë që të negociojë shitjen e tij në verë. Ndaj Vitali ka filluar kontaktet me klube të ndryshme për të sqaruar të ardhmen e lojtarit.

Pak ditë më parë u përfol se kishte pasur takime me Napolin, por sinjalin e qartë e ka dhënë duke shkuar sot në zyrat e Interit, një prej skuadrave më të interesuar për mbrojtësin shqiptar.

Sipas mediave italiane,Vitali ka bërë të ditur se çmimi prej 5 milionë eurosh që ishte përfolur deri dy muaj më parë, tashmë duhej të harrohej. Klubi i Veronës tashmë vlerësonte mbrojtësin 25 milionë euro, pasi shihte te ai një potencial të jashtëzakonshëm për t’u bërë një nga më të mirët në futbollin italian.

Një shifër që normalisht do të trembte çdo klub për një djalosh i cili ka pak muaj në elitën e futbollit duke luajtur si profesionist. Por mediat italiane raportojnë se Interi është shfaqur mjaft pozitivisht në këtë takim edhe me një vlerë të tillë merkatoje për Kumbullën dhe ka përsëritur qëndrimin për blerjen e mundshme të futbollistit, sinjal i qartë se edhe zikaltërit besojnë te potenciali që ka lojtari.

Tani pritet që Vitali të  kontaktojë edhe me klube të tjera të interesuara për futbollistin, pasi edhe emra si Fiorentina, Lazio, Juventus, Borussia Dortmund, Chelsea, Manchester United apo Leipzig kanë shfaqur interes për të.

Por që tani është e qartë për të gjithë se transferimi i Marash Kumbulllës do të shënojë vlera të rëndësishme dhe një rekord të ri për futbollin shqiptar, duke e kthyer shumë shpejt atë në lojtarin më të vlefshëm të të gjitha kohëve për Shqipërinë ende pa u bërë mirë pjesë e përfaqësueses shqiptare.

-->