Sot zhvillohen dy ndeshje gjysmëfinale të Ligës Unike

Basketboll 13 Prill 2021 13:13

Sot (e martë) në Durrës pritet të jetë shumë e ‘nxehtë’, pasi do të zhvillohen ndeshjet gjysmëfinale të Ligës Unike.

Rahoveci dhe Peja është gjysmëfinalja e parë dhe shumë interesante. Vreshtarët u kualifikuan në gjysmëfinale pa lojë, pas tërheqjes së Teutës, ndërsa Peja ishte më e mirë se Vllaznia e Shkodrës.

Të dy skuadrat duan depërtimin në finale dhe të fitojnë trofeun e çmuar që është historik, pasi është hera e parë që zhvillohet një ligë mes Kosovës e Shqipërisë në sportet kolektive.

Goga Basket pasi mundi Tiranën do të ballafaqohet me Golden Eagle Yllin, që mundi Sigal Prishtinën. Ky duel pritet të jetë shumë interesant, duke marrë parasysh cilësitë e dy skuadrave. Goga për synim të fitojë çdo trofe të mundshëm këtë edicion, kurse Ylli, që ka bërë shumë investime e dëshiron trofeun e parë të Ligës Unike, që njëkohësisht do të ishte trofeu i parë në histori të klubit.

Takimet do të zhvillohen në palestrën “Dhimtraq Goga” në Durrës dhe për shkak të masave anti-Covid do të zhvillohen pa praninë e tifozëve, përkundër interesimit të jashtëzakonshëm.

Kujtojmë që ndeshjet gjysmëfinale janë me eliminim direkt.

Liga Unike – Gjysmëfinale

E martë – 13 Prill

16:00 Gjysmëfinalja e parë: Rahoveci-Peja

19:00 Gjysmëfinalja e dytë: Goga Basket-Golden Eagle Ylli.

-->